INATISHA "WATOTO 800 WALAWITIWA TANZANIA"

JUMLA ya watoto 863, wanaripotiwa kufanyiwa vitendo vya ulawiti huku wanaowafanyia hivyo wakiwa ni ndugu zao wa karibu.

Pia watoto 250 wametupwa na kutelekezwa huku 142 wakiwa wametekwa na 10 wamefanyiwa vitendo mbalimbali vya udhalilishaji.

Hayo yalisemwa jijini Dar es Salaam jana na Kaimu Mkurugenzi wa Kituo cha Haki za Binadamu (LHRC), Harold Sungusia, alipozungumzia Siku ya Mtoto wa Afrika na changamoto mbalimbali zilizopo katika kulinda na kuheshimu haki za watoto.

Kutokana na kukithiri kwa hali hiyo, ametaka haki na ulinzi wa mtoto iwe ni ajenda ya kila mdau hasa wanasiasa kuifanya ya kitaifa katika mikutano yao.

Sungusia alisema wanasiasa wanapaswa kufanya hivyo wakiamini kwamba itahamasisha wananchi kwa uzito mkubwa kutokana na wao kuwa na nafasi kubwa ya kusikilizwa na kuwafikia wananchi wengi kwa wakati.

Kwa upande wa serikali, alitaka iweke mikakati ya kiulinzi itakayomwezesha mtoto kujitambua na kujilinda mwenyewe kabla ya mtu mwingine.

Pia alitoa rai kwa wananchi na wanajamii kwa ujumla kuheshimu nafasi ya watoto katika jamii na pale ambapo haki zao zinakiukwa basi ni vizuri kutoa taarifa kwa vyombo husika.

“Matukio mengi ya ukiukwaji wa haki za watoto yamekuwa yakitokea na kuendelea kwa sababu taarifa hazitolewi, na hata pale zinapotolewa kunakosekana ushahidi wa kutosha na hivyo kufanya watuhumiwa kuendelea na matendo maovu,” alisema.

Siku ya Mtoto wa Afrika huadhimishwa kila Juni 16 ikiwa ni kumbukumbu ya kupinga mauaji ya watoto wanafunzi waliokuwa wanaandamana kudai haki ya usawa wa elimu na haki nyinginezo katika kitongoji cha Soweto, nchini Afrika Kusini mwaka 1976.TANZANIA D