MKOROGO UNALIGHARIMU TAIFA

Mkurugenzi wa Uendeshaji Huduma kutoka Mamlaka ya Chakula na Dawa (TFDA), Dk. Sikubwambo Ngendabanka, amesema matumizi ya vipodozi vyenye kemikali ni janga la kitaifa linaloisababishia serikali hasara ya mabilioni fedha kutibu athari zake.

Wakati wa ufunguzi wa Wiki ya Utumishi wa Umma iliyoanza Dar es Salaam jana, mkurugenzi huyo alisema watumiaji wengi wa vipodozi hivyo ni wanawake.

Alisema kemikali zilizomo kwenye vipodozi hivyo zinasababisha magonjwa ya ngozi na saratani ambayo matibabu yake yanagharimu fedha nyingi zinazotolewa na serikali.

“Fedha za kuwatibu wagonjwa wa saratani kila mwaka ni nyingi zingeweza kutumika kwa shughuli nyingine za maendeleo… ndiyo maana nasema hili ni janga la kitaifa mama zetu wengi wanatumia wakitafuta urembo kumbe wanakaribisha magonjwa,” alisema Ngendabanka.

 

Watumishi wa TFDA wanatumia maonyesho hayo kutoa elimu ya kubaini bidhaa zilizo chini ya ubora, zilizokwisha muda wa matumizi na athari za vipodozi vyenye kemikali kwa wananchi wanaofika katika banda hilo.

Maonyesho ya wiki ya utumishi yanafanyika kwenye viwanja vya Mnazi Mmoja yakishirikisha idara, taasisi na mashirika ya serikali ambapo wananchi wanapata fursa ya kujua shughuli zinazofanywa na serikali kupitia maonyesho hayo yatakayohitimishwa Juni 23.Tanzania Daima