SOMA HABARI KWA UFUPI

Kampuni ya ufuaji umeme ya IPTL, imesema dhamira yake ya kushusha bei ya umeme kwa Watanzania ipo palepale.Katibu na mshauri wa masuala ya sheria wa kampuni hiyo, Joseph Makandege, alieleza hayo jijini Dar es Salaam jana alipozungumza na waandishi wa habari.Makandege alisema licha ya kuwepo kwa maneno mbalimbali dhidi yao, hawana muda wa kulumbana na badala yake wanachapa kazi, ili kuhakikisha malengo waliyojiwekea wanayafikia.

Daktari wa Hospitali ya Nyamagana, Raymond Simon (36), mkazi wa Nyamagana, Mwanza aliyekutwa amekufa katika nyumba ya kulala wageni iitwayo Nesta Inn iliyopo Ubungo, Dar es Salaam.Kamanda wa Polisi Mkoa wa Kinondoni, Camillius Wambura, alisema jana kuwa pembeni mwa mwili wa daktari huyo kulikutwa bomba la sindano lililokuwa na masalia kidogo ya damu na kete moja ya vitu  vinavyodhaniwa ni dawa ya kulevya.

Kiongozi wa Kambi Rasmi ya Upinzani Bungeni, Freeman Mbowe, amemvaa Rais Jakaya Kikwete kuwa ni mkuu wa nchi na Amiri Jeshi Mkuu wa kwanza kuchochea jeshi lake kufanya mapinduzi ya kijeshi ili kuzuia matakwa ya wananchi juu ya katiba mpya kutekelezwa.

Viongozi kumi na watatu wa mataifa na mamia ya wafanyabiashara wanakutana Abuja kwa mkutano wa biashara na masuala ya uchumi duniani kuhusu Afrika.Mkutano huo mwaka huu ulikuwa ni fursa kwa Nigeria baada ya kutajwa kuwa nchi yenye uchumi mkubwa Afrika, lakini mashambulio ya kundi la wapiganaji wa Boko Haram na wasiwasi wa kiusalama yameugubika mkutano huo.

Katika hatua ambayo haikutarajiwa Rais wa Urusi, Vladimir Putin, ametoa wito kwa makundi yanayotaka kujitenga wanaounga mkono Urusi Kusini Mashariki mwa Ukraine waahirishe kura ya maoni ya Jumapili juu ya kutaka kujitenga kama hatua muhimu kuimarisha mashauriano ya amani kati ya makundi yanayozozana nchini humo.