DIAMOND,WEMA KUTIKISA MTWARA LEO

Nyota wa muziki wa Bongo flava nchini, Diamond Platnum ameahidi makubwa kwa mashabiki wake wa Mtwara katika onesho litakalofanyika leo kwenye Ukumbi wa Makonde Club, mjini humo.

Katika shoo hiyo inayosubiriwa kwa hamu na mashabiki, Diamond aliyefanikiwa kujizolea mashabiki wengi, atasindikizwa na kipenzi chake Malkia wa Bongo Movie, Wema Sepetu.

Akizungumza juzi katika ofisi za Vodacom Tanzania ambao ni wadhamini wa tamasha hilo, Diamond amewasihi wapenzi na mashabiki wake kukaa mkao wa kiburudani kwani amejiandaa vizuri kufanya makubwa.

“Mashabiki wote waliopo Mtwara watashuhudia nikiimba live nyimbo yangu mpya ya ‘My Number One remix’ niliyomshirikisha Davido kutoka nchini Nigeria.

“Huwa sipendi kuwaangusha mashabiki zangu, hivyo basi nawaahidi makubwa sana katika tamasha hilo na ningependa kuwaona wengi wakihudhuria show hiyo kwani kutakuwepo na mengi ambayo hawakutarajia kuyaona,” alisema Diamond.

Mkuu wa Kitengo cha Masoko na Mawasiliano wa Vodacom Tanzania, Kelvin Twissa, alisema wanajivunia kudhamini tamasha hilo la aina yake.

“Tunaahidi kuendelea kuwaunga mkono wasanii wetu wa Kitanzania na kujivunia kilicho chetu, wote ni mashahidi kwa namna ambavyo tumekuwa msitari wa mbele kuwaunga mkono wasanii wetu na tutaendelea na jitihada hizo na kufikia viwango vya wasanii wengine wa kimataifa,” alisema.Tanzania Daima