HABARI KWA UFUPI

Mfanyabiashara mmoja ameuawa kwa kupigwa risasi siku ya Ijumaa katika eneo la Mlimani City.

Edson Cheyo, ambaye ni mmiliki wa kampuni ya Sowers African iliyopo jirani na Mlimani City, alifikwa na umauti baada ya kuchukua fedha benki. Inadaiwa baada ya kutoka benki watu waliokuwa katika pikipiki walimpiga risasi na kuondoka na fedha zote alizokuwanazo.

Kamati ya Siasa mkoani Mbeya, imeagiza kuitwa kwa Naibu Waziri wa Viwanda na Biashara, Bi. Janeth Mbene ili aweze kuhojiwa akidaiwa kujihusisha na vurugu za kisiasa zinazoendelea katika Wilaya ya Ileje, mkoani humo.

Serikali ya Jamhuri ya Kidemokrasi ya Congo imesema watu wawili wamekufa kutokana na ugonjwa wa Ebola, uliolipuka kaskazini-magharibi mwa nchi hiyo.Hao ni wagonjwa wa kwanza wa Ebola kuripotiwa nje ya Afrika Magharibi tangu kuzuka kwa ugonjwa huo huko, ingawaje haijaeleweka wazi kama vifo vya watu hao vinahusiana na mlipuko wa Ebola katika nchi za Afrika Magharibi.

Maafisa wa serikali ya Uingereza wanasema kuwa mfanyakazi mmoja wa utabibu kutoka Uingereza ambaye ameambukizwa virusi vya Ebola nchini Sierra Leone, ataletwa Uingereza. Atasafirishwa kwa ndege ya jeshi la wanahewa la Uingereza.