AL-SHABAB WAKAMATWA ARUSHA

Watuhumiwa 14, wanaosadikiwa kujihusisha na makundi ya kigaidi nchini, ikiwemo kundi maarufu la Al-Shabab, wamefikishwa mahakamani kujibu mashtaka 16 ya kuua na kukusudia kuua.

Al-Shabab ni kundi la kigaidi la nchini Somalia, linaloendesha mauaji, utekaji nyara, uvamizi ndani na nje ya nchi hiyo.

Watuhumiwa hao, wanahusishwa na tukio la  milipuko ya mabomu katika maeneo ya Mianzini  na  Arusha Night Park hivi karibuni.

Washtakiwa hao wanatuhumiwa kusajili na kusafirisha vijana kwenda katika mafunzo maalum nje ya nchi kujifundisha masuala ya kigaidi na kushawishi vijana katika maeneo mbalimbali ya nchi.

Wakisomewa mashtaka jana, katika Mahakama ya Mkoa wa Arusha na Mwendesha Mashtaka wakili wa serikali, Hariri Muda, mbele ya Hakimu Mustapha Sian, washtakiwa hao hawakutakiwa kujibu chochote kwa kuwa mahakama hiyo haina uwezo wa kusikiliza kesi hiyo.

Waliofikishwa mahakamani jana ni Abdallah Athumani, Abdallah Thabiti,Ally Hamisi, Abdallah Wambura, 

Rajabu Hemedi, Hasani Saidi, Ally Hamisi, Yasini Sanga, Shaabani Wawa,Swalehe Hamisi,Abdallah Yasini, Sudi Nasibu Lusuma huku washtakiwa wawili; Abdul-karimu Thabia Hasia na Rajabu Phili Hemedi wakisomewa mashtaka yao wakiwa wamelazwa katika Hospitali ya Mount Meru.

Akisoma mashtaka hayo, Wakili wa serikali, Muda alidai upelelezi wa kesi hiyo bado unaendelea na utakapokamilika kesi hiyo itahamishiwa Mahakama Kuu kwa kusikilizwa.

Mwendesha mashtaka huyo, alidai kati ya mwaka 2010 hadi 2014, washtakiwa hao walifanya kazi ya kushawishi na kusajili vijana kwa lengo la kuwapeleka katika  mafunzo maalum ya uhalifu katika nchi moja ambayo jina limehifadhiwa kwa sasa.

Alidai katika muda huo walisajili vijana kutoka maeneo mbalimbali nchini ambapo jitihada za uchunguzi kuwabaini wote waliosajiliwa zinaendelea ili wakipatikana nao waunganishwe katika kesi hiyo.

Hakimu Siani aliahirisha kesi hiyo hadi Juni 12, mwaka huu na kama upelelezi utakakuwa umekamilika kesi hiyo itahamishiwa Mahakama Kuu.

Walivyopelekwa

Magari yasiyopungua 10 yaliyokuwa yamesheheni askari wenye silaha ndiyo yaliyowapeleka mahakamani na kuwarudisha magereza  watuhumia hao.

Msafara wa watuhumiwa hao pia ulikuwa ukiongozwa na pikipiki za polisi zilizokuwa zikiliza ving’ora, hali iliyowafanya  baadhi ya wananchi kupata hofu.

Shughuli za mahakama nazo zilisimama kwa muda baada ya watuhumiwa hao kufikishwa hapo na kuwekwa katika chumba maalum kabla ya kuingia ndani katika ukumbi wa mahakama kusikiliza mashtaka yao.

Ndani ya ukumbi kulisheheni  askari wenye silaha na askari Kanzu waliovaa kiraia huku  mbwa wa polisi nao wakirandaranda nje ya viunga vya mahakama hiyo kwa ajili ya kuimarisha ulinzi.

Polisi wazungumza

Awali  akizungumza na waandishi wa habari katika ofisi za Kamanda wa Polisi mkoa wa Arusha Mkurugenzi Mkuu wa Makosa ya Jinai nchini (DCI), Issaya Mungulu, alisema kukamatwa kwa watuhumiwa hao kunatokana na upelelezi ulioanza muda mrefu baada ya kuanza kutokea milipuko ya mabomu jijini Arusha.

Alisema matokeo ya upelelezi huo ndiyo yaliyosababisha kukamatwa kwa watuhumiwa hao na polisi inaelendelea kuwasaka wengine waliohusika na milipuko ya mabomu katika jiji hilo.

Alisema watuhumiwa zaidi ya 25 ndiyo  wanaodhaniwa kuhusika na matukio hayo mawili na pindi watakapokamatwa nao watafikishwa mahakamani.TANZANIA DAIMA