VIJANA HATARINI KUPATA MAGONJWA YASIYOAMBUKIZWA

Imeelezwa vijana wenye umri wa kuanzia miaka 35 na kuendelea wapo kwenye hatari kubwa ya kupata magonjwa yasiyoambukizwa.

Akizungumza na Tanzania Daima jijini Dar es Salaam jana, mfamasia kutoka Mfuko wa Taifa wa Bima ya Afya (NHIF), Goodluck Madehu, alisema vijana wa umri huo hawana utaratibu mzuri wa kula na kufanya mazoezi.

Madehu alisema hayo wakati wa mkutano wa 28 wa mwaka wa wanasayansi na watafiti kutoka nchi mbalimbali duniani ulioandaliwa na Taasisi ya Taifa ya Utafiti na Magonjwa (NIMRI) uliomalizika jana jijini hapa.

“Hili sasa linaweza kuwa janga la taifa maana kila tunakokwenda kutoa huduma za kupima bila malipo kama ilivyo utaratibu wa NIHF, tunagundua vijana wengi wana uzito uliozidi na uliopindukia.

“Inatokana na ukosefu wa elimu ya lishe, watu wanakula bila mpangilio, wanashindwa kujizuia na mbaya zaidi hawafanyi mazoezi, hata kwa macho mtu mwenye uzito uliozidi anaonekana…,” alisema mfamasia huyo.

Kwa mujibu wa Madehu, NIHF imeamua kuwasaidia vijana na wananchi wote kwa kuchapisha na kugawa vitabu vinavyoeleza namna sahihi ya kula na kudhibiti uzito wa mwili.

Alisema uzito unaozidi na kupindukia unakaribisha maradhi yasiyoambukizwa, likiwemo shinikizo la damu, sukari na saratani.

Mfamasia huyo alisema kwa siku tatu za mkutano huo, NHIF imetoa bure huduma za vipimo vya sukari, shinikizo la damu na urefu na uzito (BMI) ambapo washiriki zaidi ya 260 kati ya 350 wa mkutano huo walihudumiwa na asilimia 98 ya waliopima walikutwa na uzito uliozidi.Tanzania Daima