SOMA HABARI KWA UFUPI

Zaidi ya watu 10 wamefariki dunia na wengine kujeruhiwa katika ajali ya basi iliyotokea jana katika Kijiji cha Yitwimila ‘A’, Kitongoji cha Ichila, Kata ya Kaloleni, Tarafa ya Busega, mkoani Simiyu.Ajali hiyo imetokea ikiwa ni takriban wiki tatu zimepita tangu ajali nyingine mbili zitokee mkoani Kilimanjaro ambapo kina mama zaidi ya 12 waliokuwa wakitoka msibani walipata ajali na kufariki dunia na nyingine iliyoua zaidi ya watu 22, Kikwa mkoani Pwani.

Askofu Mkuu wa Kanisa Katoliki Jimbo Kuu la Dar es Salaam, Muadhama Polycarp Kardinali Pengo, amekemea tabia ya utoaji mimba inayofanywa na baadhi ya wanawake nchini kwani kufanya hivyo ni kupingana na amri ya Mungu.Pia amekemea dhana potofu ya ndoa za jinsia moja kwa kisingizio cha kukataa kupata watoto.

Wakati zikiwa zimesalia siku nne kabla ya Bunge Maalumu la Katiba kuahirishwa, Mwenyekiti wa Bunge la Katiba yuko visiwani Zanzibar kwa lengo la kuteta na viongozi wakuu visiwani humo.Ziara hiyo ya Sitta ina lengo la kutoa taarifa za namna Bunge hilo linavyoendelea na kupata mawazo ya namna bora ya kufikia lengo ambalo ni kupata Katiba mpya

Msemaji wa Ikulu ya White House ametaja uchaguzi wa Urais uliopangwa kufanywa nchini Syria kama "Mzaha wa Demokrasia".Jay Carney alisema matokeo ya uchaguzi huo hayatatambuliwa nchini au nje.Umoja wa Mataifa na Jumuiya ya Ulaya wametoa maoni sawa na hayo, na kusisitiza kuwa uchaguzi kama huo utavuruga utaratibu wa kisiasa nchini humo.

Uchunguzi wa kina wa BBC umethibitisha kuwa baadhi ya wakazi wa mpaka wa Niger na Nigeria wamekuwa wakishirikiana na wapiganaji wa Boko Haram ili walipwe pesa.Nchi zilizo jirani na Nigeria, kama Niger, Cameroon, na Chad zinahofia kuwa harakati za wanamgambo hao zitaathiri usalama wa nchi hizo.

.