MWANDISHI APIGWA KWENYE BOMOABOMOA HUKO MBEYA

Mmwandishi wa habari wa gazeti la Tanzania Daima mkoani Mbeya, Gordon Kalulunga (35), amenusurika kifo baada ya kupigwa na mgambo wa jiji hili waliokuwa kwenye shughuli za operesheni vunjavunja.

Kalulunga alikutwa na zahama hiyo wakati akipiga picha mwendelezo wa operesheni hiyo iliyokuwa ikifanyika sehemu ambayo mtoto wa miezi minne alifichwa na mama yake akiwa kwenye mfuko wa salfeti kabla ya kuokolewa na wasamaria wema.

Vunjavunja hiyo ilifanyika wakati wa sherehe za Jumatatu ya Pasaka baada ya uongozi wa jiji kubariki shughuli ya kuwaondoa wafanyabiashara waliopanga bidhaa zao kando ya barabara kuu ya Tanzania – Zambia eneo la Mwanjelwa.

“Nilikuwa kazini akatokea mwanamke amevaa gauni refu la rangi ya njano na kunikaba shati, ndipo mgambo wa jiji walipokuja na kuanza kunipiga… ilibidi kamera yangu nimkabidhi polisi. Lakini nimepoteza redio yangu ya kurekodia,” alisema Kalulunga.

Alisema baada ya tukio hilo, ilibidi atoe taarifa kwenye kituo kidogo cha polisi Mwanjelwa na kupewa fomu ya matibabu (PF3) kisha ilibidi apatiwe matibabu na aliporudi polisi, alitakiwa na mkuu wa kituo akatoe maelezo kwenye kituo kikuu cha polisi kwa OC –CID au mkuu wa polisi wilaya (OCD).

“Namshukuru Mkuu wa Polisi Wilaya ya Mbeya, Richard Mchomvu ametumia busara kunikutanisha na kiongozi wa operesheni hiyo kutoka idara ya afya, mkuu wa mgambo na bosi wangu, jiji wamekiri kunipiga kwa madai ya kutofahamu kuwa ni mwandishi,” alisema Kalulunga.

Kwa upande wake, Mchomvu aliushauri uongozi wa jiji hilo kushirikiana na vyombo vya habari katika majukumu yake kwa kuwa wananchi wanapaswa kuelimishwa zaidi kila jambo linapofanyika na kusisitiza kuwa usafi wa jiji ni muhimu, hivyo kila upande una jukumu lake.

Wakati hayo yakitokea, wauzaji magazeti jijini humo wamelalamikia operesheni hiyo baada ya meza zao kuvunjwa usiku wa manane wakati uongozi wa jiji hilo unafahamu fika aina ya meza zilizoruhusiwa kuwepo kwa ajili ya kuuzia magazeti.Tanzania Daima