HABARI KWA UFUPI

Mkazi wa Kisukuru jijini Dar es Salaam, Irene Ibrahim anadaiwa kujinyonga hadi kufa, ikiwa saa chache kupita  tangu aage kuwa anasafiri kwenda Marekani.Kamishna wa Polisi wa Kanda Maalumu Dar es Salaam, Suleiman Kova alithibitisha kutokea kwa tukio hilo na kwamba, mwili wa marehemu ulikutwa kwenye shamba la Abdalah Mshindo jirani na eneo alilokuwa anaishi.

Wizara ya Mambo ya Ndani imetoa ufafanuzi kuhusu ajira zilizositishwa na kusema siyo zile zilizoandikwa na vyombo mbalimbali vya habari jana.Jana vyombo vya habari viliandika kuwa ajira 70 za Idara ya Uhamiaji kwa nafasi ya Mkaguzi Msaidizi Uhamiaji zilisitishwa baada ya kuwapo na madai ya upendeleo.

Wakazi wa Kijiji cha Masusu, Kata ya Gisambalang wilayani Hanang’ katika Mkoa wa Manyara wamepatwa na mshtuko kutokana na tukio lenye utata la kuuawa mtoto Omary Hamis mwenye umri wa mitatu, kisha mwili wake kutundikwa juu ya mti.Inadaiwa kuwa Omary aliuawa na watoto wenzake wawili ambao ni wakazi wa kijiji hicho kwa kumpiga kwa fimbo kisha kumnyonga na baadaye kuutundika mwili wake juu ya mti.

Watu wawili, baba na mwanawe, wamekufa baada ya gari walilokuwa wakisafiria kutoka jijini Dar es Salaam kuelekea  Ikwiriri kuacha njia na kugonga kingo ya Mto Kihoi na kupinduka.Kamanda wa polisi wa Mkoa wa Pwani, Ulrich Matei alisema ajali hiyo ilitokea juzi saa 5:00 usiku, eneo la Kihoi Ikwiriri na aliwataja waliokufa katika ajali hiyo kuwa ni Ramadhani Nassoro aliyekuwa dereva na mwanaye Abuu Ramadhani.

Nchi ya Liberia imefunga mipaka yake iliyo mingi ya kuingia nchini humo ili kudhibiti kuenea kwa maambukizi mapya ya ugonjwa Ebola.Hata hivyo katika kuongeza jitihada Zaidi nchi hiyo vituo vya uchunguzi vimewekwa katika baadhi ya mipaka ya kuingia nchini humo vikiwemo viwanja vya ndege.